10.3.1. Uimhreacha

Ceadaítear focail nó figiúirí a úsáid le milliúin agus billiúin ach cloítear le córas amháin laistigh den aon téacs amháin.

• Úsáidtear ‘Uimh.’ mar leagan giorraithe de ‘Uimhir’ agus ‘Uimhreacha’. Bíonn spás crua idir é agus an figiúr a thagann ina dhiaidh:

  Uimh. 3

  Uimh. 3 agus 4.

• Leantar an treoir atá i gCaibidil 9 de An Caighdeán Oifigiúil, 2017 do na bunuimhreacha go ginearálta. Féach Iarscríbhinn B maidir leis na bunuimhreacha a scríobh ina bhfigiúirí.
• Scríobhtar daichead seachas ceathracha:

  Comórfaidh an tArdionadaí cruinniú urghnách den Chomhairle laistigh d'ocht n-uaire an chloig is daichead.

• Uimhreacha nó figiúirí?
  • Roimh na focail soicind, nóiméad, uair an chloig, lá, seachtain, coicís, mí, ráithe agus bliain, scríobhtar na huimhreacha i bhfigiúirí. Le gach rud eile, mar riail ghinearálta, scríobhtar na huimhreacha óna haon go dtí a naoi i bhfocail agus scríobhtar uimhreacha óna deich ar aghaidh i bhfigiúirí.

    Beidh bliain coibhéiseach le 4 ráithe, 12 mhí nó 52 sheachtain

    Beidh ráithe coibhéiseach le 3 mhí.

  • Leantar an pátrún seo i gcás na n-orduimhreacha freisin:

    an naoú duine, an 19ú haois

  • Má bhíonn uimhir óna haon go dtí a naoi agus uimhir óna deich ar aghaidh ann, scríobhtar iad araon i bhfigiúirí:

    Seolfar na figiúirí 7-10 lá oibre tar éis dheireadh gach míosa.

    Obair íoctha 3 go 12 mhí a bheidh i gceist.

  • Úsáidtear figiúirí i réimse an staidrimh, i dtorthaí vótála agus nuair a bíonn sraith uimhreacha á lua mura ndéantar a mhalairt san fhoinse atá á lua (e.g. Cuid a Seacht den Chonradh ar an Aonas Eorpach):

    Vótáil 12 thoscaireacht i bhfabhar an togra; vótáil 7 dtoscaireacht ina choinne, agus staon 6 thoscaireacht.

  • Úsáidtear figiúirí agus cainníochtaí á gcur in iúl:

    6 kg, 7 mbliana, 11 mhéadar, 28 000 tona

  • Úsáidtear figiúirí agus aonaid tomhais á gcur in iúl le siombailí nó le giorrúcháin:

    EUR 50, 250 kW, 205 μg, 5 °C

  • Ceadaítear focail nó figiúirí a úsáid le milliúin agus billiúin (féach Pointe 7.3.3) ach cloítear le córas amháin laistigh den aon téacs amháin

    EUR 2 000 000 nó EUR 2 mhilliún

• codáin
  • Ná baintear úsáid as an bhfleiscín nuair a bhíonn codáin á gcur in iúl:

    tromlach dhá thrian; sé sheacht

• deachúlacha:
  • I réimse an staidrimh, cuireann gach ionad de dheachúlacha le cruinneas, fiú más nialas é. Ní hionann 3.5 % agus 3.50 % ná 3½ %.
  • Úsáidtear córas na maoluimhreacha agus uimhreacha deachúla á lua.
  • Ná déantar infhilleadh ná athrú tosaigh ar ainmfhocal atá ar lorg uimhir dheachúlach, bíodh sí i bhfoirm focal nó figiúirí:

  ocht ponc a sé gram

  6.3 milliún

  5.2 méadar ciúbach

• céatadáin:
  • Úsáidtear córas na maoluimhreacha agus céatadáin á lua. Féach Iarscríbhinn B – Na bunuimhreacha agus céatadáin a scríobh ina bhfigiúirí ).

    i 21 %

    i bhfiche a haon faoin gcéad

    in 18 %

    in ocht déag faoin gcéad

  • Bíonn spás crua roimh an gcomhartha céatadáin (féach Pointe 6.4):

    15 %

• uimhriú leathanach:
  • Cuirtear raon leathanach in iúl mar a leanas:

    lgh. 7-13, 312-17

    lch. 67 ar aghaidh

  • Scríobhtar ‘ó 50 go 100’ nó ‘50-100’ ach ná scríobhtar ‘ó 50-100’
  • Ná cuirtear figiúirí i dtús abairte más féidir sin a sheachaint. Scríobhtar an uimhir amach ina hiomláine nó úsáid seift eile:

    Trí bhreitheamh déag a bheidh ar an mór-dhlísheomra.

    Ba é 1847 an bhliain ba mheasa.

• na huimhreacha pearsanta:
  • Úsáidtear na huimhreacha pearsanta (ó ‘beirt’ go ‘dháréag’) chun daoine a chomhaireamh

    Ceapfar beirt chomhaltaí arna n-ainmniú ag Poblacht Chónaidhme na Gearmáine

    Ceapfar 14 chomhalta dhéag roimh an 1 Eanáir 2021.