1.1. L-istruttura ġenerali

Il-Ġurnal Uffiċjali jikkonsisti fi tliet serjejiet: Leġiżlazzjoni (L), Informazzjoni u Avviżi (C), u Suppliment ta’ Il-Ġurnal Uffiċjali tal-Unjoni Ewropea (S).

Il-Ġurnal Uffiċjali tal-Unjoni Ewropea jikkonsisti fi tliet serjejiet:

Is-serje L u C huma ppubblikati att b’att kuljum, mit-Tnejn sal-Ġimgħa, kif ukoll is-Sibtijiet, il-Ħdud u l-festi pubbliċi f’każijiet urġenti.

info:
Pubblikazzjoni att b’att tal-Ġurnal Uffiċjali

Sat-30 ta’ Settembru 2023, l-edizzjonijiet ta’ kuljum tal-Ġurnal Uffiċjali kienu kompilazzjonijiet ta’ dokumenti ppubblikati dakinhar stess. Bl-introduzzjoni tal-pubblikazzjoni att b’att fl-1 ta’ Ottubru 2023, kull ħarġa tal-Ġurnal Uffiċjali fiha dokument wieħed biss.

Il-pubblikazzjoni att b’att iżżid kemm il-flessibbiltà kif ukoll il-ħeffa tal-proċess tal-pubblikazzjoni. Id-dokumenti kollha issa huma ppubblikati b’mod indipendenti, u b’hekk l-użu ta’ serje addizzjonali għall-pubblikazzjonijiet urġenti mhuwiex meħtieġ. Għaldaqstant, is-serje L … I u C … I twaqqfu mill-1 ta’ Ottubru 2023 u se tibqa’ biss is-serje L u C ewlenija. Is-serje C … A twaqqfet ukoll.

Ir-referenzjar tal-Ġurnal Uffiċjali huwa bbażat fuq is-serje tiegħu, in-numru tad-dokument (għajr għall-ftehimiet internazzjonali u r-rettifiki), id-data tal-pubblikazzjoni u l-ELI — ir-referenza tal-paġna ma għadhiex valida. Għal aktar informazzjoni dwar ir-referenzjar, ara t-Taqsima 3.1 “Ir-referenzi għall-Ġurnal Uffiċjali”.

Is-serje L

Is-serje L tiġbor fiha dawn l-intestaturi:

  • atti leġiżlattivi (L I),
  • atti mhux leġiżlattivi (L II),
  • atti oħrajn (L III),
  • rettifiki.

Ara wkoll it-Taqsima 1.2 “is-serje L”.

Is-serje C

Is-serje C tiġbor fiha dawn l-intestaturi:

  • riżoluzzjonijiet, rakkomandazzjonijiet u opinjonijiet (C I),
  • komunikazzjonijiet (C II),
  • atti preparatorji (C III),
  • informazzjoni (C IV),
  • avviżi (C V),
  • rettifiki.

Minħabba l-għadd ta’ atti differenti li jiġu ppubblikati fis-serje C, hemm varjetà akbar ta’ preżentazzjonijiet tipografiċi meta mqabbla mal-Ġurnal Uffiċjali tas-serje L, iżda r-regoli li wieħed irid jimxi magħhom jibqgħu l-istess għat-tnejn li huma.

Ara wkoll it-Taqsima 1.3 “is-serje C”.

info:
Is-serje C qabel l-1 ta’ Ottubru 2023

Is-serje C kienet supplimentata bis-serje C … A, is-C … E (twaqqfet mill-1 ta’ April 2014) u s-serje C … I. Il-puntini jirrappreżentaw in-numru tal-Ġurnal Uffiċjali tas-serje C ta’ dakinhar.

  • Is-serje C … A (A = Anness)
    Din is-serje kienet riżervata għall-pubblikazzjoni ta’ kompetizzjonijiet miftuħa, avviżi ta’ pożizzjonijiet vakanti u katalogi komuni (varjetajiet ta’ speċijiet agrikoli, eċċ.).
  • Is-serje C … E (E = elettronika)
    Din is-serje kienet riżervata għall-pubblikazzjoni ta’ ċerti testi, bħalma huma l-pożizzjonijiet tal-Kunsill skont il-proċedura leġiżlattiva ordinarja jew il-minuti u t-testi adottati mill-Parlament Ewropew. Dawn huma disponibbli fuq is-sit tal-EUR-Lex (u fuq id-DVD li dak iż-żmien kien joħroġ kull xahar).
  • Is-serje C … I (I = iżolata)

ĠU C 137, 27.5.2010

ĠU C 137 A, 27.5.2010

ĠU C 137 E, 27.5.2010

ĠU C 119 I, 5.4.2018

Is-serje S

Is-serje S (S = suppliment) hija riżervata għall-pubblikazzjoni ta’ sejħiet għal offerti għal kuntratti pubbliċi, kif ukoll avviżi mill-Fond Ewropew għall-Iżvilupp u istituzzjonijiet, korpi, uffiċċji u aġenziji oħrajn. Din is-serje hija disponibbli fuq DVD u minn fuq l-Internet (id-database tat-TED).