1.2.1. Il-klassifikazzjoni tal-atti

L-atti huma kklassifikati skont l-intestatura (L I, L II, eċċ.) u s-subintestatura (“Regolamenti”,” Direttivi”, eċċ.) f’ordni speċifiku.

L-atti huma kklassifikati skont l-intestatura (L I, L II, eċċ.) u s-subintestatura (“Regolamenti”, “Direttivi”, eċċ.) fl-ordni mogħtija hawn taħt (ara wkoll l-istruttura tal-Ġurnal Uffiċjali fl-EUR-Lex).

info:
Il-Ġurnal Uffiċjali — serje L

L I — Atti leġiżlattivi

  • Regolamenti
  • Direttivi
  • Deċiżjonijiet
  • Baġits

L II — Atti mhux leġiżlattivi

  • Ftehimiet internazzjonali
  • Regolamenti
  • Direttivi
  • Deċiżjonijiet
  • Rakkomandazzjonijiet
  • Linji gwida
  • Regoli ta’ proċedura
  • Atti adottati minn korpi stabbiliti permezz ta’ ftehimiet internazzjonali
  • Ftehimiet interistituzzjonali

L III — Atti oħrajn

  • Iż-Żona Ekonomika Ewropea
NB:

L-intestatura L IV — Atti adottati qabel l-1 ta' Diċembru 2009 skont it-Trattat KE, it-Trattat UE u t-Trattat Euratom, intużat temporanjament wara l-1 ta' Jannar 2010 biex tiġbor fiha atti adottati qabel l-1 ta' Diċembru 2009 taħt it-Trattat KE, it-Trattat UE u t-Trattat Euratom. Din l-intestatura llum m'għadhiex fl-użu.

Taħt kull intestatura, l-atti huma kklassifikati skont:

  • it-tip (regolament, direttiva, deċiżjoni, baġit, eċċ.), u
  • l-ordni tal-awtur (ara t-Taqsima 3.4.2): Il-Parlament Ewropew, il-Kunsill Ewropew, il-Parlament Ewropew u l-Kunsill, il-Kunsill, il-Kummissjoni Ewropea, il-Qorti tal-Ġustizzja tal-Unjoni Ewropea, il-Bank Ċentrali Ewropew, il-Qorti tal-Awdituri, eċċ.
NB:

Taħt l-intestatura L II, is-subintestaturi “Regolamenti”, “Direttivi” u “Deċiżjonijiet”, skont l-ordni msemmija hawn fuq u għall-awturi kkonċernati, l-atti huma kklassifikati fl-ordni li ġejja:

  1. atti bbażati direttament fuq it-Trattati;
  2. atti delegati;
  3. atti ta’ implimentazzjoni.

Għal eżempji, ara “Tabelli ta’ sommarju”.

Intestaturi

Is-serje L tal-Ġurnal Uffiċjali tinkludi l-intestaturi li ġejjin.

L I — Atti leġiżlattivi

Din l-intestatura tiġbor fiha l-“atti leġiżlattivi” skont it-Trattat dwar il-Funzjonament tal-Unjoni Ewropea, jiġifieri r-regolamenti, id-direttivi u d-deċiżjonijiet li jiġu adottati:

  • bil-“proċedura leġiżlattiva ordinarja” (l-adozzjoni konġunta mill-Parlament Ewropew u l-Kunsill),
  • bi “proċedura leġiżlattiva speċjali” (adottata mill-Kunsill bil-parteċipazzjoni tal-Parlament Ewropew jew adottata mill-Parlament Ewropew bil-parteċipazzjoni tal-Kunsill).

L-atti leġiżlattivi jkopru wkoll il-baġit annwali tal-Unjoni Ewropea (kif ukoll kull baġit emendatorju relatat), kif ikun adottat skont proċedura leġiżlattiva speċjali.

NB:

Il-“baġit annwali” tal-Unjoni Ewropea qabel kien jissejjaħ il-“baġit ġenerali”. Fl-2022, għalhekk, it-titolu tal-att li jadotta definittivament il-baġit, inbidel (“Adozzjoni definittiva tal-baġit annwali tal-Unjoni Ewropea”).

Qabel l-1 ta’ Diċembru 2009, il-baġit tal-Unjoni Ewropea kien jiġi ppubblikat fl-Intestatura L II (Atti mhux leġiżlattivi), bl-att ta' adozzjoni intitolat “Adozzjoni finali tal-baġit ġenerali tal-Unjoni Ewropea”. Id-dikjarazzjonijiet tad-dħul u n-nefqa tal-aġenziji li kienu jiġu ppubblikati fis-serje L issa jinsabu fis-serje C.

L II — Atti mhux leġiżlattivi

Din l-intestatura tiġbor fiha l-“atti mhux leġiżlattivi” skont it-Trattat dwar il-Funzjonament tal-Unjoni Ewropea: ir-regolamenti, id-direttivi u d-deċiżjonijiet li ma jkunux adottati bi proċedura leġiżlattiva, (l-atti delegati (l-Artikolu 290), l-atti ta’ implimentazzjoni (l-Artikolu 291) u l-atti bbażati direttament fuq it-Trattat (atti li jirreferu għal ftehimiet internazzjonali, deċiżjonijiet PESK, eċċ.)), kif ukoll atti oħrajn, bħal ma huma r-rakkomandazzjonijiet u l-linji gwida tal-BĊE.

L III — Atti oħrajn

Din l-intestatura tkopri l-"atti l-oħrajn", bħal dawk taż-Żona Ekonomika Ewropea.