3.4.1. L-ordni tat-Trattati

L-ordni li fiha jiġu ċċitati t-Trattati (b’mod partikolari fil- konsiderazzjonijiet) tiddependi minn meta ġie ppubblikat it-test; f’xi każijiet, jistgħu jintużaw ċerti formoli mqassra.

Mill-1 ta’ Diċembru 2009 (id-data tad-dħul fis-seħħ tat-Trattat ta’ Liżbona) l-ordni li fih jiġu ċċitati t-Trattati (b’mod partikolari l-konsiderazzjonijiet) huwa kif ġej:

  • Wara li kkonsidrat it-Trattat dwar l-Unjoni Ewropea,
  • Wara li kkonsidrat it-Trattat dwar il-Funzjonament tal-Unjoni Ewropea,
  • Wara li kkonsidrat it-Trattat li jistabbilixxi l-Komunità Ewropea tal-Enerġija Atomika,
NB:

Sat-30 ta’ Novembru 2009, l-ordni li fih kienu jiġu ċċitati t-Trattati kien kif ġej:

  • Wara li kkonsidrat it-Trattat li jistabbilixxi l-Komunità Ewropea,
  • Wara li kkonsidrat it-Trattat li jistabbilixxi l-Komunità Ewropea tal-Faħam u l-Azzar,
    (it-Trattat KEFA skada fl-23 ta’ Lulju 2002)
  • Wara li kkonsidrat it-Trattat li jistabbilixxi l-Komunità Ewropea tal-Enerġija Atomika,
  • Wara li kkonsidrat it-Trattat dwar l-Unjoni Ewropea,
    (dan it-Trattat spiss jiġi l-aħħar, iżda jista’ jiġi l-ewwel).

L-ordni li fih il-“Komunitajiet” kienu jiġu ċċitati nbidel matul iż-żminijiet:

  1. Sal-aħħar tal-1997, l-ordni li fih kienu jiġu ċċitati l-Komunitajiet fit-titoli tal-atti kien jinbidel kull sena skont din l-iskema:

    • K(E)E, Euratom, KEFA:
      1968, 1971, 1974, 1977, 1980, 1983, 1986, 1989, 1992, 1995,
    • Euratom, KEFA, K(E)E:
      1969, 1972, 1975, 1978, 1981, 1984, 1987, 1990, 1993, 1996,
    • KEFA, K(E)E, Euratom:
      1970, 1973, 1976, 1979, 1982, 1985, 1988, 1991, 1994, 1997.
  2. Mill-1998 sat-23 ta’ Lulju 2002, l-ordni ma kienx jinbidel, kif ġej:
    • KE, KEFA, Euratom
  3. Bejn l-24 ta’ Lulju 2002 (wara l-iskadenza tat-Trattat KEFA) u t-30 ta’ Novembru 2009, l-ordni li fih kienu jiġu ċċitati l-Komunitajiet kien:
    • KE, Euratom
  4. Wara l-1 ta’ Diċembru 2009:
    • UE, Euratom

It-termini “Komunità Ekonomika Ewropea” u “Komunità Ewropea” kienu jintużaw kif ġej:

  • Il-Komunità Ekonomika Ewropea jew KEE: għal atti adottati qabel l-1 ta’ Novembru 1993,
  • Il-Komunità Ewropea jew KE: għal atti adottati mill-1 ta’ Novembru 1993.
info:
Ir-referenza għat-Trattati

Meta t-Trattati jissemmew għall-ewwel darba għandhom jintużaw it-titoli sħaħ.

Għaċ-ċitazzjonijiet li jiġu wara:

  1. meta jiġi ċċitat trattat wieħed biss fl-istess test, tintuża l-kelma “Trattat”,
  2. meta jiġu ċċitati diversi trattati fl-istess test, sakemm jista’ jkun tingħata d-denominazzjoni sħiħa. Inkella, it-titoli tat-trattati jistgħu jiġu ċċitati fil-forma mqassra:
    • “Trattat UE” għat-Trattat dwar l-Unjoni Ewropea,
    • “TFUE” għat-Trattat dwar il-Funzjonament tal-Unjoni Ewropea,
    • “Trattat KE” għat-Trattat li jistabbilixxi l-Komunità Ewropea,
    • “Trattat Euratom” għat-Trattat li jistabbilixxi l-Komunità Ewropea tal-Enerġija Atomika,
    • “Trattat KEFA” għat-Trattat li jistabbilixxi l-Komunità Ewropea tal-Faħam u l-Azzar.
NB:

Fl-1999 (it-Trattat ta’ Amsterdam) u fl-2009 (it-Trattat ta’ Liżbona) seħħew rinumerazzjonijiet tad-dispożizzjonijiet tat-Trattati. Il-Qorti tal-Ġustizzja u l-Qorti Ġenerali jsegwu prattiki partikolari biex jiċċitaw artikoli, skont jekk ikunux jixtiequ jirreferu għall-verżjonijiet ta’ qabel jew ta’ wara ta’ dawn ir-rinumerazzjonijiet suċċessivi.