4.1.3. Qari tal-Provi fl‑Uffiċċju
Il-qarrejja tal-provi jservu ta’ par għajnejn ġodda għat-test li se jiġi ppubblikat u huma fdati bil-kontroll lingwistiku (ir-rispett lejn il‑lingwa u l‑konvenzjonijiet tagħha) u tekniku (rispett lejn it‑tipografija).
Il-qarrejja tal-provi jservu ta’ par għajnejn ġodda għat-test li se jiġi ppubblikat u huma fdati bil-kontroll lingwistiku (ir‑rispett lejn il‑lingwa u l‑konvenzjonijiet tagħha) u tekniku (rispett lejn it‑tipografija). Madankollu, il‑qarrejja tal-provi mhumiex reviżuri: għandhom jibqgħu newtrali fil-konfront tal-intenzjonijiet tal-awtur u dan jibqa’ dejjem l‑uniku ġudikatur fir-rigward tat‑test.
Finalizzazzjoni tal-manuskritti
Il-manuskritti jiġu fdati lill-qarrejja tal-provi għall-finalizzazzjoni (preparazzjoni tipografika u qari tat‑test). Dan l‑istadju qabel il‑produzzjoni huwa maħsub biex jikkoreġi l‑iżbalji ortografiċi u grammatikali u jindividwa l‑impreċiżjonijiet u l‑inkoerenzi, biex il‑messaġġ li jintbagħat ikun jinftiehem perfettament. Għandu wkoll ikun hemm eżami bir-reqqa tal-omoġeneità fl‑elementi kollha tal-manuskritt. Kull ambigwità jew dubju għandu jiġi indirizzat b’kooperazzjoni mill-qrib mad-dipartiment tal-awturi.
Il-qarrejja tal-provi għandhom ukoll jassiguraw li t‑test ikun konformi mar-regoli u l‑konvenzjonijiet interistituzzjonali ta’ din il‑Gwida tal-Istil.
Fuq talba tad-dipartiment tal-awturi, u bil‑qbil tiegħu minn qabel, jistgħu jsiru interventi editorjali iktar profondi (reviżjoni editorjali tat‑test).
In-numerazzjoni tal-paġni tal-manuskritt, li trid tkun ġiet miftiehma mad-dipartiment tal-awturi, tiġi kkontrollata u kkompletata, skont il‑każ. L‑elementi kollha neqsin tal-manuskritt għandhom jiġu notifikati immedjatament. Għandha tiġi ċċekkjata wkoll il‑konformità tan-noti fit-test man-noti ta’ qiegħ il‑paġna.
Hija l‑kompetenza tas-servizz tal-awtur li jaċċerta l‑konformità tal-verżjonijiet lingwistiċi differenti tal-manuskritt. Madankollu, l‑Uffiċċju tal-Pubblikazzjonijiet jista’ jwettaq dan il‑kontroll, skont il‑każ, u jekk is‑servizz tal-awtur jagħti biżżejjed żmien qabel id‑dati ta’ skadenza.
L-għan ewlieni tal-finalizzazzjoni tal-manuskritti huwa li jiffaċilita l‑ħidma tal-kompożizzjoni b’tali mod li ma jsirux spejjeż żejda iktar ’il quddiem. Il-kwalità tal-manuskritt mogħti lill-istampatur hija għalhekk element ewlieni fil-proċess sussegwenti tal-produzzjoni. L‑awturi, huma u jikkonformaw mal‑indikazzjonijiet dwar it‑tħejjija u l‑preżentazzjoni tal-manuskritti (ara t‑Taqsima 4.2), u huma u jassiguraw il‑kwalità impekkabbli tat‑test, għandhom l‑opportunità li jillimitaw l‑ispejjeż tal-produzzjoni, filwaqt li jħaffu l‑proċess (il‑formola għall-pubblikazzjoni tista’ tingħata wkoll għall-ewwel prova).
Manuskritt difettuż jista’ jintbagħat lura lill-awtur.
Manuskritt tajjeb jiggarantixxi produzzjoni rapida u ta’ kwalità.
Il-provi u l‑korrezzjonijiet tal-awtur
Il-provi jiġu kkoreġuti mill-qarrejja tal-provi li jivverifikaw il‑korrispondenza tat‑test mal‑manuskritt mogħti u mar-regoli tal-użu għal kull lingwa. Jintbagħat sett tal-ewwel provi lid-dipartiment tal-awturi għall-approvazzjoni u fl-istess ħin biex jiddaħħlu l‑korrezzjonijiet tal-awtur.
Il-korrezzjonijiet tal-awtur fuq il‑provi għandhom ikunu limitati għal dak li hu essenzjali. Id‑dipartiment tal-awtur għandu jassigura li l‑korrezzjonijiet tiegħu jkunu leġibbli, viżibbli u b’tali mod li l‑qarrej tal-provi ma jkollux għalfejn jirrevedi x‑xogħol linja b’linja (korrezzjonijiet bl‑aħmar, viżibbli ħafna, imdawrin b’ċirku jew fil-ġenb tal-paġna; l‑awtur ma għandux jagħmel il‑korrezzjonijiet tiegħu fuq karta separata).
L-istampatur iqis bħala korrezzjoni tal-awtur — bi spiża addizzjonali — kull korrezzjoni fuq il‑prova li tkun differenti mill-manuskritt inizjali (titjib, korrezzjonijiet, armonizzazzjonijet, aġġornamenti, kjarifiki li jirriżultaw minn manuskritt mhux ċar jew mhux imħejji sew, eċċ.). F’dan l‑istadju, wieħed ma għandux jibqa’ jimmodifika l‑frażjoloġija, u lanqas ma għandu jaġġorna l‑fatti jew iċ-ċifri li jaslu fl‑aħħar minuta u li jkunu iktar reċenti mill-perjodu ta’ referenza tax-xogħol, u lanqas ma għandhom jiżdiedu sinjali tal-punteġġatura bil-għan ta’ perfezzjoni mhux realistika.
Il-korrezzjonijiet tal-awtur, jiġifieri l‑addizzjonijiet u t‑tneħħijiet kollha, minn sempliċi virgola għal paragrafu sħiħ, għandhom jiġu evitati kemm jista’ jkun minħabba possibbiltà ta’ dewmien u tal-ispejjeż li jinvolvu. L‑ispejjeż jistgħu jilħqu ammonti sinifikanti u li ma jkunux jidhru proporzjonati fil-konfront tal-korrezzjonijiet mitluba. Modifika minima tista’ twassal għar-riformular ta’ paragrafi sħaħ, għal tqassim mill-ġdid ta’ diversi paġni jew tal-manuskritt kollu b’effett eventwali fuq il‑paġinazzjoni, fuq il‑werrej u fuq ir‑referenzi fit-test jew fl‑indiċi (fil-każ ta’ modifiki li jitqiesu indispensabbli, hija r‑responsabbiltà tal-awtur li jieħu f’idejh it‑tibdil li jirriżulta).
Il-kompożizzjoni teħtieġ ġeneralment żewġ provi. Waqt l‑ewwel prova, il‑qarrej tal-provi jaqra t‑test kollu u jqabblu mal‑manuskritt; huwa jivverifika jekk it‑test fihx l‑elementi kollha u jekk tħarsux l‑istruzzjonijiet tipografiċi. Fit-tieni prova mbagħad huwa jivverifka kull korrezzjoni li tkun saret fl‑ewwel prova. L‑ebda korrezzjoni tal-awtur ma għandha tiġi aċċettata fl‑istadju tat‑tieni prova.
Fir-rigward ta’ pubblikazzjonijiet perjodiċi jew urġenti, u li jkunu soġġetti għal data ta’ skadenza, id‑dipartiment tal-awtur għandu jirispetta data għat-tmiem tal-editjar. Din l‑eżiġenza tippermetti mhux biss li jiġu rispettati l‑iskadenzi, iżda wkoll li ma jsirux korrezzjonijiet tal-awtur fl‑aħħar minuta u, għalhekk, ma jsirux spejjeż żejda.
Fl-aħħar nett, ta’ min jinnota li l‑Uffiċċju tal-Pubblikazzjonijiet ma jistax jaċċetta li jsiru korrezzjonijiet tal-awtur mingħajr il‑qbil formali tad-dipartiment tal-awtorizzazzjoni.