8.1. Referenzi għan-noti ta’ qiegħ il-paġna

Ir-referenzi għan-noti f’qiegħ il-paġna jistgħu jidhru bħala ċifri, asteriski u ittri, u huma identiċi fil-verżjonijiet lingwistiċi kollha.

Ir-referenzi għan-noti ta’ qiegħ il-paġna għandhom jidhru b’mod identiku fil-verżjonijiet lingwistiċi kollha; jistgħu jidhru f’dawn il-forom:

• iċ-ċifra b’tipa sopraskritta bejn il-parentesi bl-istess valur fit-test, ippreċeduta bi spazju fiss (fuq il-kompjuter issir hekk: control, shift, space bar) u segwit bi kwalunkwe sinjal ta’punteġġatura:

  Referenzi għar-Regolament tal-Kunsill(¹) jidhru wkoll fil-komunikazzjoni tal-Kunsill(²); iżda mhux fit-test tal-Qorti tal-Ġustizzja(³).

• asterisk b’tipa sopraskritta bejn il-parentesi bl-istess valur fit-test, preċedut bi spazju fiss u segwit bi kwalunkwe punteġġatura; dan is-sinjal hu applikat f’nota li tidher f’dokument aktar minn darba u li dejjem għandha l-istess tifsira.

  Iċ-ċifri kollha ġejjin mill-Eurostat(*).

• b’eċċezzjoni, ittra b’tipa sopraskritta żgħira tista’ tintuża f’tabella b’ċifri b’tipi żgħar sabiex ikunu evitati l-iżbalji u l-konfużjoni.

Ġeneralment ir-referenzi għan-noti ta’ qiegħ il-paġna huma nnumerati fl-istess paġna u stampati fil-qiegħ tal-paġna korrispondenti b’tipa iżgħar minn dik użata fit-test (ġeneralment, żewġ punti iżgħar) separati mit-test b’linja u spazju ta’ linja. Jistgħu jkunu nnumerati wkoll f’kontinwità u mlaqqgħin fl-aħħar tal-kapitolu jew il-volum.

Fil-Ġurnal Uffiċjali, in-noti ta’ qiegħ il-paġna huma nnumerati waħda wara l‑oħra, u huma nnumerati separatament fl-att jew fit-test prinċipali tad-dokument u fl-annessi individwali.

Ir-referenza għal nota tal-qiegħ (inklużi l-parentesi) tinkiteb dejjem bit-tipa Rumana (anke f’testi jew titoli miktubin bil-korsiv jew b’tipa grassa).

Meta nota tal-qiegħ tidher f’tabella n-nota għandha tkun parti mit-tabella u konsegwentement tidher fil-kwadru tat-tabella.